O! vous lou sage,
O! vous lou mage,
Que Diéu nous a douna!
De que sarie Prouvènço
Se noun erias nascu,
Se noun avias viscu,
Se noun avias sachu,
Se noun avias tengu?
Anequelido e apaurido
E dins soun eime e sa fierta
L'avès troubado e aparado,
En glòri aussado,
E ensignado
I prouvençau desavia.
E nosto lengo matrassado,
Pèr lis arlèri mespresado,
Dins lou patouès qu'èro toumbado,
Coume l'avès mai enaurado!
Benesi siegue lou jour,
Jour de clarta e jour d'amour,
Qu'au soulèu de voste Maiano,
Dins la vido vidanto païsano
Durberias vòsti ciho
En fàci di bluios aupiho.
Urouso vosto famiho,
Urous lou brès que vous a bressa
E lou bon la qu'avès teta;
Urous l'enfant que fuguerias
Abari dins la pas
E dins lou soulas,
Dins lou crèire
Di rèire,
E dins lis esperanço,
E dins li benuranço
De nosto fe crestiano
D'aquéli de Maiano
Au terraire estaca
Qu'avès sèmpre ama,
Qu'avès sèmpre canta.
Terraire de lumiero
Tant bèu qu'uno preguiero!
E urous enca mai lou pople de Prouvenço
Dins sis ancian e sa jouvènço
Que n'en sias lou sauvaire,
E que n'en sias lou paire,
Au dela dóu toumbèu
Dins nòsti cor fidèu
Pèr toujour enliama
Pèr tant d'amour leissa.
O, paire de la patrìo!
Lausa siegue voste noum!
Dins li jas, dins li mas,
Dins la pas di dous bos d'óulivié
E di blanqui flour d'amelié.
Pèr l'or escrèt dóu blad madur,
Pèr lou courau dóu sant vin pur,
Pèr lou fièr mistrau pouderous,
Pèr lou Diéu Rose ufanous,
Lausa siegue voste noum!
Divin pouèto dis armounìo
De la Prouvençalo matrìo!
Pèr lou ceu linde, lou gai souleu,
Pèr li mount e li planestèu,
Pèr lou riban de l'Arlatenco
E la crous d'or de la Canenco;
Lou tambourin escrincela.
Lou flahutet tres fes trauca.
Pèr lis estivalo cigalo,
Pèr lou bouisset verd de l'ivèr,
Pèr la calandro dins lis èr,
La sentourousa ferigoulo
E lou perfuma roumanin
Au long de seearous camin;
Pèr lou cipres e la piboulo
Que pounchon vers lou cèu
Un aguious cimèu;
Pèr lis ouratòri beni
De nosto maire dóu Paradis
E de tout li sant de Prouvènço,
Que flourisson dins la lusènço
Di matin clar di rouguesoun
Li bòni gent dóu recantoun,
Païsan i mans atravalido;
Pèr lou fum siau de la bastido
E dóu fiò atuba au fougau,
Pèr lou mèstre fièr de Foustau,
Pèr lou bourgès e l'artisano,
O noste paire de Maiano!
Pèr lis èrso de la mar blouso,
Pèr li restanco soulèiouso
Pèr lis ermitòri quiha
Sus li coutau ventouleja;
E pèr li pastre
Dins lou mentastre
E l'esparset
Gardan l'avé;
Pèr li santoun de nòsti crècho,
Pèr la flamo, que mounto drecho
Dóu cacho-fiò de nadau,
Pèr lou gros soupa calendau;
Pèr tout ço que grèio e que viéu
En terro nostro, benesi Diéu,
Que voste noum siegue lausa!
E aro dins la pas dóu toumbèu,
Mau-grat li plueio e li soulèu,
Emai li cop dóu fér mistrau,
Poudès dourmi tout siau
En esperant lou grand revèire
De tóuti li feien e de touti li rèire,
Dins la celèsto eternita :
Au daut de la capoucho blanquinello,
E dins la lus de Santo-Estello
Lou Sant signau es fa!
Jan Gavot, 21 mai 1954
Text nach: http://sites.univ-provence.fr/tresoc/libre/integral/libr0302.pdf am 22.3.08 - veraltet
neuerdings (05.11.2015): http://www.cieldoc.com/libre/libr0302.htm
| zurück | © 1975/2008 by nf und pr | established 22.03.2008, revised & updated 16.11.2010 | BilderGalerie |